Giovanni Meli – poeta e drammaturgo italiano
(Palermo, 6 marzo 1740 – Palermo, 20 dicembre 1815)
Lu labbru
Dimmi, dimmi, apuzza nica
Unni vai cussì matinu?
Nun c’è cima chi arrussica
Di lu munti a nui vicinu:
Trema ancora, ancora luci
La ruggiada ‘ntra li prati,
Dun’accura nun ti arruci
L’ali d’oru dilicati!
Li ciuriddi durmigghiusi
‘Ntra li virdi soi buttuni
Stannu ancora stritti e chiusi
Cu li testi a pinnuluni.
Ma l’aluzza s’affatica!
Ma tu voli e fai caminu!
Dimmi, dimmi, apuzza nica,
Unni vai cussì matinu?
Cerchi meli? E s’iddu è chissu
Chiudi l’ali e ‘un ti straccari,
Ti lu ‘nsignu un locu fissu
Unn’hai sempri chi sucari
Lu canusci lu miu amuri,
Nici mia di l’occhi beddi?
‘Ntra ddi labbra c’è un sapuri,
‘Na ducizza chi mai speddi
‘Ntra lu labbru culuritu
Di lu caru amatu beni
C’è lu meli chiù squisitu…
Suca, sucalu, ca veni.
Ddà ci misi lu Piaciri
Lu sò nidu ‘ncilippatu
Pri adiscari, pri rapiri
Ogni cori dilicatu.
A lu munnu ‘un si pò dari
Una sorti chiù felici,
Chi vasari, chi sucari
Li labbruzzi a la mia Nici.
Lu Surci e Lu Rizzu
Facìa friddu, ed un surci ‘ngriddutizzu
mentri sta tra la tana ‘ncrafucchiatu,
senti a la porta lamintari un rizzu
chi ci dumanna alloggiu, umiliatu:
“Jeu, dici, ‘un vogghiu lettu, né capizzu;
mi contentu di un angulu, o di un latu.
O mi mettu a li pedi ’mpizzu ‘mpizzu,
basta chi sia da l’aria riparatu”.
Lu surci era bon cori, e spissu tocca
A li bon cori agghiùttiri cutugna;
su’ assai l’ingrati, chi scuva la ciocca!
Trasi lu rizzu, e tantu si cc’incugna
Chi pri li spini lu surci tarocca,
e dispiratu da la tana scugna:
e di cchiù lu rampugna
l’usurpaturi, e jia gridannu ancora:
“Cui punciri si senti nèscia fora”.
